...عين الحسود فيها

حسد، عين، حقد، غيره،،، ما الفرق؟
الصراحه ما راح افتي و اختلق فرق. كل من الخصال البشعه المذكوره اعلاه تقول "الزود عندي". بس اعتقد ان المسأله اول شي تبدي بالغيره

راح ابدي افتي شوي ok lol
كل شخص غار من احد في يوم من اللأيام، سواً كان على شي يسوى او ما يسوى ...احلى مني، اضعف مني، عندها عيال
هالتفكير يمر على ذهن الانسان بدون ما يحس أو يشعر
مو معناته ان اللي حس بالغيره شخص مو زين او شي من هذا القبيل. فيه غيره بريئه خارج عن ارادتنا و تتوقف عند حد الامنيات و هذي ما تأذي
اما ان بدأ الشخص بالتمادي و الدخول بالتفكير المضر لغيره هنا يدخل في دائرة الحسد. الحاسد برأيي انه انسان حقود اناني يتمنى زوال النعمه من غيره ويتمناها له وحده... رغبة في الارتفاع علي حطام الغير
الحسد قد يؤدي الى النميمه و ال"حش" في المحسود لكي يضر سمعته بالمجتمع و تأليف القصص والروايات الباطله عن هذا الشخص. وفيه درجه هم أعلى بالحسد والحقد اللي تخلي الحاسد ينفعل و يقوم بأفعال تضر المحسود جسدياً!! يا أخي سو مثله و فكنا
تمناله الخير و حط راسك و نام مرتاح! لا ما يجوز.. شلون أنام و فلان مسوي أحسن مني بالبورصه! خل أدعمه يمكن نفتك..
ولا شلون تنام و توها راده من عرس و مادحين فيه وحده صايره تجنن و اهي كانت معاي بالثنويه متينه و جيكره ولا كنت شايله همها انها تنافسني!! لازم أطرش صورها باجر لما كانت مو شي.. كود يغيرون رايهم..
ليس من الضروره ان يكون الحاسد اقل من المحسود، بل يكون احياناً افضل منه في المال.. في الولد.. في العمل.. و هذي بلوه أكبر
!
أما العين.. من وين ابدي.. صار الخوف من العين شغل الشاغل في مجتمعنا المتخلف، لدرجه انه اصبح فيه شي او مرض اسمه الوسواس من العين! قامت الشاطره تطلع من الامتحان تبكي و تذرف الدموع كأن أحد مكوفنها.. يسألونها شفييييج؟ تقول ما جاوبت كل الاسأله والوقت ما كفى.. عقب كم يوم تطلع النتائج ولا اهيا الثانيه على الكويت
LOL كل هذا خوف من العين
يعني مو مشكله تكذبين في سبيل أجتناب العين والحسد؟ دخلنا موضوع ثاني أعظم..
!كل مسأله، مصيبه تحصل في حياة هذا المهلوس يقول عين
بوكي ضاع.. عين! مو اهمال
سيارتي اوقفت.. عين! مو لأن خلص البانزين
!طلعتلي نفره.. عين! شعري حت.. عين! خدامتنا انحاشت.. عين! عين عين عين! عفيا عين
وين القضاء والقدر؟
!العين صارت شماعه الكل يرمي اغلاطه و الأشياء اللي مالها تفسير عليها

انا أقول
لن يصيبنا إلا ما كتب الله لنا

خدا حافظ